愛愛愛 (Part 2) - 最佳損友

個topic叫[最佳損友],只不過係因為我同以下呢兩個人可以乜都講,包括一D relatively 無咁嚴肅嘅話題. =P

我都有成5年多無返香港,不過有兩個喺香港嘅人,只要佢地是但一個做一樣嘢,我就會即刻[飛]返香港.
做乜?就係只要佢地是但一個決定同佢地嘅[女朋友](不過其中一個未有)結婚,我就一定會返去飲.有乜原因佢地結婚我一定要返去?因為佢地都係我嘅[好兄弟] .

第一個要講嘅就係我喺香港嘅中小學同學.其實我同佢嘅性格都幾唔同,以前間唔中都因為各持己見而嘈交,但係好快就會下左淡氣無事.我地鐘意嘅嘢又好唔同,興趣除左大家都鐘意睇NBA之外,其他興趣都無樣同,甚至乎鐘意女仔嘅類型都基本上完全唔同,但係偏偏就成為[好兄弟].
我同佢成為[好兄弟]嘅原因就係以前大家都住得好近,放學都會一齊返屋企.而雖然佢鐘意漫畫而我就鐘意聽歌,但係十多年前我地都會一齊去一D好似信和(以前無4仔賣ga)呢D主力賣CD同漫畫嘅青年人商場.傾得多,相處得多,友誼就慢慢建立得根深蒂固.
我同佢有乜嘢係合作得最天衣無縫呢?唔係打藍球[One Two]一傳一射,而係寸人.或者因為我同佢都係聽[軟硬]大,所以寸人嘅時候都好叻一唱一和.而對上一次返香港嘅時候,最開心嘅其中一件事就係[發現]我同佢雖然[Long Time No See],但係[默契]無變, hehe... =P

至於另一個喺香港嘅[好兄弟]就係喺團契/church識嘅"陸叔".其實我未同佢熟之前就覺得佢份人好似好鐘意吹水,無嚟[認真].但係因為我同佢喺同一年一齊成為團契嘅職員,因而有一齊合作嘅機會.我仲[記得]有一次同佢傾週會,因為一早就傾完,所以就傾下一D自己嘢,當中包括各自嘅一D[秘密].或者就係因為呢一次所建立嘅信任,同埋[發現]佢為人並不如我以前所想咁樣,所以之後就成為[無所不談],可以交心嘅[好兄弟].
雖然佢大約兩年前返左香港,但係我地都依然成日MSN,間唔中亦會通下電話.而可能由於我地[天各一方]嘅關係,所以有乜事我都可以[無須擔心],[毫無保留]咁話佢知,而各自遇到有乜事嘅時候亦都會互相support.

其實究竟我同佢地有幾咁[好兄弟],聽下首歌就知.

好兄弟 軟硬天師 MV (youtube)
曲/監：黃貫中 詞：林海峰/葛民輝/黃貫中 編：黃貫中/恭碩良

好兄弟 前事不提 誰沒有一起搶過玩具爭櫈仔
做兄弟 似對夫妻 緣份一嚟 然後一齊 同渡安危
今生有幸共你 唔要爛尾 講心講金講乜我都制 講一世
永冇勞氣 舖舖和棋輸死自己 無收費

好兄弟閒話休提 矇著眼一於跟你撐到天腳底
做兄弟莫問身世 無大蝦細 無反骨仔 無食塞米
即使壯士斷臂 能夠為你 擋刀擋槍擋乜我都制 無乜計
撐你台戲 有我和你 出生入死 我梗制

上刀山 落火海 你仆低我為你去墊底　
講一聲 你喜歡 共患難落地獄冇問題
有今生冇來世 眼濕濕有鼻涕 愛黃金更愛兄弟

心口掛住義氣 唔似做戲 好好睇睇總之無失禮 好矜貴
我夠雷氣 我鋸大脾 我爭住死 無所謂

上刀山 落火海 你仆低我為你去墊底
講一聲 你喜歡 共患難落地獄冇問題 有今生冇來世

打生打死有乜好睇 拜關公拜上帝 反枱反櫈認真失禮 好兄弟
不分高矮坐低傾計 咪將心當做肺 捐心捐肺捐窿都制 好兄弟
有錢出錢有計出計 冇金撈送白米 吞火吞劍吞一包米 好兄弟
好好睇睇好好睇睇 有今生冇來世 天空海闊點少得..喂 好兄弟