Hard to say I'm sorry

一件"意外"令到我有D唔同嘅嘢想寫, 而因為唔同topics嘅關係, 我決定分開兩個posts嚟寫.

之前我有同事去咗我介紹俾佢嘅眼科醫生度驗眼, 當個眼科醫生知道係我介紹之後, 就同我同事講"佢勁有禮貌".

[我自問]都算一個幾有禮貌嘅人, 總覺得講多句唔該/[多謝]係應該做嘅.
不過對於屋企人, 唔知[點解]要講呢D"禮貌說話"就變得好難.

話說星期一從spring conference返屋企, 喺去完廁所之後唔知咩原因(相信係零件老化嘅關係)浴室個[馬桶]水箱喺咁[慢慢]地漏水. 而因為我瞓咗覺同我阿爸睇緊電視留意唔到嘅情況下, 就攪到水浸. 最離奇係個浴室其實無乜事, 但係樓下個Family room就災情[嚴重].

雖然其實唔係好關我事(基本上輪到邊個用果個廁所就死邊個), 但係我始終都係"Last touch"嘅關係, 所以都係衰係我手. 我同阿爸講"對唔住, 攪成咁"嘅時候, 阿爸都話"邊關你事".

但係其實當我同阿爸講[I'm sorry]嘅時候, 我感覺好不安, 因為屋企唔興講呢D嘢, 覺得好怪好唔慣.

我屋企一向都係"傳統中國家庭"的相處方法, 基本上做對事情都唔會講任何positive or 鼓勵嘅說話, 喺其他人面前D仔女都係"唔掂無樣叻"("地底泥"曾經係我嘅代號), 屋企人之間就差不多唔會講唔該, [對不起,謝謝]等"客套"說話, 又唔會有[擁抱]or講[我愛你]呢D[親密]舉動.

或者因為咁, 自己從來都不善於表達自己嘅情感. 亦都因為咁, 所以對著屋企人都係"報喜不報憂"(雖然報喜佢地都唔會講咩好說話, 但係起碼好過報憂嘅時候會聽到D令我憂上加憂嘅說話), 甚至乎講"對唔住"都好似好大壓力.

或者因為自己係"過來人", 所以第時如果有小朋友的話都會盡量避免做返一D自己其實唔鍾意父母做過嘅事情. 如果你已經為人父母的話, 希望呢個post能夠俾到你一D提醒.

(待續)